Unhas 70 persoas tomaron boa nota onte mércores das experiencias dos relatores na mesa redonda organizada polo Club Deportivo Miralba co apoio da Fundación VIDE e a Federación Galega de Fútbol Sala.
Por espazo de hora e cuarto, o salón de actos do colexio Miralba (Xesuitinas) converteuse nun foro no que Xabier Alonso, concelleiro de Deportes; Jorge Santos, director de Infancia, Mocidade e Deportes de Caixanova; o médico Elías Festa, a xogadora do Celta Indepo Pilar Valero e o directivo da FGFS Jorge López trataron sobre saúde e deporte dende os seus programas e/ou experiencias.
Laura Magdalena, directora xerente de VIDE, foi a encargada de resumir os relatorios e deixou tres titulares para a introspección do público: “A educación deportiva é importantísima para o desenvolvemento saudable das persoas; o deporte non compite cos estudos académicos; e o deporte é unha fábrica de valores, como a capacidade de superación, de esforzo, de integración, de toma de decisións, de igualdade...".
Presentou o acto Ignacio Parajó, director do colexio Miralba, que se mostrou satisfeito por levar ante pais e nais, alumnado e deportistas “un amplo espectro do deporte vigués. Nós seguimos aportando o noso gran de área".