Catro días de tolos para o Celta Bosco. Chéganlle as dúas estranxeiras que lle faltaban, xoga tres partidos e presenta un convenio co hospital A nosa Señora de Fátima.
Onte, o conxunto vigués recibiu á súa penúltima estranxeira, a brasileira Damiris Dantas, logo de acadar o título americano e meter a cabeza nos Xogos de Londres 2012. A xoven pivote que Carlos Colinas coñeceu cando dirixiu a Brasil tivo tempo para ver a vitoria das súas compañeiras no sétimo amigable da pretemporada, segundo choque nas Travesas. O Celta impúxose ao Vagos por 57-53 (19-28 ao intervalo). O equipo de Aveiro, que estará este ano nas copas europeas, viña de gañar a Copa da Liga Feminina do seu país na pista do Algés (54-67).
As de Nuno Ferreira, lideradas pola pivote brasileira Dos Santos, foron sempre por diante pero, como no amigable de ida en Vagos (71-72), perderon. Marina Delgado anotou oito dos seus once puntos no período final para remontar o partido.
Hoxe esperábase á senegalesa Aya Traoré, subcampioa de África (Senegal cedeu o título a Angola) e elixida no quinteto inicial do campionato que se disputou en Mali. Problemas de voos atrasaron a chegada da aleiro, que voaba de Dakar (Senegal) a Madrid e que debería aterrar en Peinador mañá venres. Pouco máis de catro horas despois será presentada na Fundación VIDE xunto a Damiris Dantas, e xa pola tarde vestirase a camiseta celeste contra o Carmelitas Ourense no pavillón ferrolán de Esteiro, dentro das semifinais da Copa Galicia (18:30).
Por vez primeira o equipo ourensán de Liga Feminina 2 disputa a Final a Catro da Copa Galicia. Haberá novo campión ao caer na eliminatoria previa o Thetrend Vilagarcía, que defendía título. De gañar, o Celta disputará a final o sábado contra o que pase da semifinal Ensino-Universitario Ferrol. O Codigalco Carmelitas, adestrado por Juan Rodríguez, conta coa á-pivote Laura Alonso (1,79), primeiro ano senior pero procedente do equipo junior do Celta. As súas estranxeiras son a base Maaike Klein (1,77, internacional por Holanda, como Kooij), a estadounidense Necolia Simmons (ala-pivote, 1,83), a escolta sueca Beata Gullberg (1,78) e a pivote cubana Zuleira Atíes (1,90), que lle fixo 27 puntos ao Vilagarcía.
O Celta Bosco inicia a Liga Feminina o vindeiro día 15 nas Travesas ante Caja Rural Zamora, recentemente ascendido.
57. Celta Bosco (19+38): Anna Gómez (11), Sara Gómez (5), Maja Vucurovic (7), Leonie Kooij (4), Demetress Adams (11) -cinco inicial-, Marina Delgado (11), Déborah Rodríguez (-), Maria Centeno (3) y Marta Canella (5).
53. AD Vagos (28+25): Joana Lopes (8), Inês Faustino (9), Lilian Gonçalves (6), Flávia dos Santos (15), Daniela Domingues (2) -cinco inicial-, Inês Pinto (-), Ana Teixeira (7) e Carolina Anacleto (-).
Parciais: 11-17, 8-11 (19-28, descanso), 17-13 (36-41) e 21-12 (57-53).
