A windsurfista Lara Lagoa pelexará este mércores por medalla na categoría Techno 293 na primeira edición dos Xogos Olímpicos da Mocidade. Dúas fabulosas regatas á primeira hora desta mañá no Centro Nacional de Vela de Singapura catapultaron á viguesa a colocarse a só tres puntos da prata e o bronce.

Porque o embotellamento de aspirantes foi incrible nesta penúltima xornada. Disputadas dúas mangas con volubles condicións de vento, finalmente cancelouse polo comité de regatas o resto das previstas e mañá, ás 6:00 horas de Galicia (mediodía en Singapura), disputarase a regata pola medalla de ouro, como así se denomina á regata final, que non pode ser descartada das puntuacións finais.

Lagoa, do Náutico de Cangas (na imaxe de hoxe, do fotógrafo Imran Ahmad, publicada na web oficial dos Xogos), estivo a piques de ser segunda na primeira saída matinal, pero a italiana Verónica Fanciulli coouse entre a tailandesa Siripon Kaewduang, que será ouro, e ela. Se na primeira regata navegouse con seis nós cando minutos antes se medían ata doce, na segunda proba subiu o vento ata os 8 nós. As representantes de Tailandia, Singapura e Israel comezaron diante, pero un role do vento cambiou o panorama na flota e a viguesa, bolseira por VIDE por segundo ano consecutivo, colocouse líder seguida pola bielorrusa Valkevich. Con todo, Kaewduang soubo reaccionar e púxose por diante para sumar a súa quinta regata consecutiva como primeira clasificada; a taiwanesa fixo sete primeiros postos en dez regatas. Bestial.

O mellor para a regatista galega é que a súa segunda praza final foi gañada con gran diferenza: entre a súa táboa e as perseguidoras, a arxentina Valentina Serigos e a transalpina Fanciulli, era de 50 metros. Con estes resultados, Lara Lagoa recupera a sexta praza e, ademais, rebaixa de nove a tres puntos a súa distancia coa medalla de prata. Lagoa está a só tres puntos do subcampeonato, pero tamén do terceiro posto e do cuarto lugar, e a un punto da quinta praza.

Por detrás, a sétima clasificada, Valkevich, está moi afastada e ata agora só conseguiu, cando estivo por diante, sacarlle cinco postos de vantaxe.

Lagoa, a máis baixiña das dezaoito olímpicas (mide 1,55 metros, once centímetros menos que a líder tailandesa, que é catro días maior que ela), é tamén a que menos peso ten (48 quilos) xunto con, precisamente, a tailandesa. Por iso o pouco vento beneficiaría mañá a Lara, aínda que cabe lembrar que a israelí é a vixente campioa do mundo e a italiana foi bronce no Mundial de Martigues, hai poucas semanas. Lara leva unha regularidade admirable: cando os resultados non eran magníficos non baixou do oitavo posto, e nas cinco últimas cinco regatas fixo os terceiros mellores resultados da flota.