Os vigueses, despois dun primeiro cuarto no que mostraron todos os seus defectos, ensinaron as súas virtudes nos outros tres períodos para lograr unha cómoda vitoria fronte ao Hercesa (73-49) recuperando sensacións e moral de cara ao encontro da próxima semana ante o Econy Gran Canaria, o último do ano 2009.
Despois dunha semana de parón, os pupilos de Abraham Carrión esperaban con ansiedade o seu encontro deste sábado ante o C.D. Hercesa. A priori, era a oportunidade ideal para esquecer a dolorosa derrota encaixada en Badalona fronte ao Gam Joventut e unha estupenda ocasión para sumar o segundo triunfo da tempada e empezar a arranxar antes da interrupción navideño o decepcionante comezo de campaña do Aldasa Amfiv. E os nervios a punto estiveron de xogarlles unha mala pasada aos vigueses, que mostraron a súa peor cara no primeiro cuarto (15-20). Afortunadamente, os locais empezaron a arranxar o estrago nos segundos dez minutos cun grande parcial de 21-3 (36-23 ao descanso) e mantiveron esa mesma tónica tras o intermedio para anotarse con claridade a vitoria (73-49).
O comezo do partido foi unha mostra perfecta do que lle acontece ao Aldasa esta tempada. Os vigueses, que se medían a un recén ascendido, exhibiron todos os defectos que acumulan neste inicio de campaña, provocando que calquera rival lles cree apuros. A precipitación, os numerosos balóns perdidos e a escasa intensidade defensiva, concedendo cómodas posicións de tiro aos madrileños, provocaron que o Hercesa sementase a incerteza na bancada do Pavillón de Bouzas (15-20, min.10)
Non obstante, a situación variou radicalmente a partir do segundo cuarto porque os vigueses mostraron as súas virtudes en dez bos minutos para deixar encarrilada a vitoria. E iso que a terceira falta persoal de Lorenzo Envó, que lle obrigaba a irse ao banco, parecía presaxiar problemas para os locais (22-22, min.14). Todo o contrario. A saída a pista de Vicky e de Najib, acompañados pola boa actuación do pívot mexicano Lalo, permitiu ao Aldasa completar un espectacular parcial de 21-3 para que o choque ao encontro quedase case sentenciado (36-23, min.20).
Despois do descanso, o conxunto de Abraham Carrión saíu disposto a seguir coa inercia e manter as boas sensacións adquiridas no segundo cuarto, cunha boa defensa presionante despois de canastra propia que continuaba creando moitos problemas ao Hercesa. Deste modo, a renda aumentaba co paso dos minutos, superando os vinte puntos ao finalizar o terceiro período (58-35).
Só un desastre absoluto podía provocar que o Aldasa deixase escapar a súa segunda vitoria da tempada. Non a houbo e, a pesar de que co partido xa roto os locais caeron nunha excesiva precipitación e concederon demasiadas facilidades en defensa para que os madrileños puidesen anotar, o Amfiv puido volver sorrir. O próximo sábado en Canarias ante o Econy os vigueses trataron de encadear o seu segundo triunfo consecutivo para afrontar o paro de Nadal coa moral xa plenamente recuperada.
FICHA TÉCNICA
ALDASA AMFIV: Bernabé Costas (12), Moncho Pombo (-), David Mouriz (-), Lorenzo Envó (11), Agustín Alejos (10) -cinco inicial-, Najib Essahiri (5), Xullo Vilas (4), Lalo (16), Vicky Alonso (10), Santi Comesaña (-) e Leo Tahti (4).
CD HERCESA: Igrexas (11), Henares (11), Boulafa (13), Rodríguez (11), Augado (-) -cinco inicial-, Kulboca (-), Núñez (-), García (-), Martín (2) e Guapo (1).
PARCIAIS: 15-20, 36-23 (descanso), 58-35 e 73-49 (final)
ÁRBITROS: Antón e González. Sen eliminados.
INCIDENCIAS: Encontro correspondente á sétima xornada da División de Honra de Baloncesto en Cadeira de Rodas disputado no Pavillón de Bouzas. Aproximadamente 200 espectadores.