O conxunto vigués organizou un partido de exhibición para que todos eles puidesen experimentar a inesquecible experiencia de sentar nunha cadeira de rodas e disputar un interesante encontro. O Pavillón de Bouzas presentou na tarde deste xoves 3 de decembro, Día Mundial das Persoas con Minusvalidez, a súa cara máis solidaria.

Ninguén se quixo perder a posibilidade de acudir ao acto convocado polo Club Deportivo Amfiv dentro das actividades programadas para conmemorar este día na cidade. A entidade presidida por Pablo Beiro citou os representantes das diferentes institucións autonómicas, provinciais e locais, das empresas que colaboran co club e dos medios de comunicación, así como os deportistas dos clubs de elite da cidade, para disputar un partido de exhibición. E ninguén se quixo perder a oportunidade de vivir en primeira persoa a sensación de xogar ao baloncesto nunha cadeira de rodas.

Os asistentes dividíronse en dous equipos. O branco, que contaba nas súas filas con tres xogadores do Aldasa -Najib, Lalo e Vicky- e coa presenza do concelleiro de Deportes, Xabier Alonso, o ciclista Óscar Pereiro, o ex xogador do Celta Vlado Gudelj, David Mallo, en representación de Fibanc Mediolanum, e senllos representantes do Celta Indepo e o Pilotes Pousada, estivo dirixido polo técnico do Amfiv, Abraham Carrión, quen tivo ao seu lado no banco ao céltico Borja Oubiña, que finalmente non puido xogar. En conxunto verde, pola súa banda, tivo como adestrador o responsable das escolas deportivas do club vigués, Antonio Riveiro, quen contou cun amplo equipo: David Mouriz, Santi Comesaña e Xullo Vilas del Aldasa, o Secretario Xeral para ou Deporte, José Ramón Lete Lasa, o Deputado Provincial de Deportes, José Enrique Sotelo, a Directora-Xerente da Fundación Vide, Laura Magdalena, o responsable de Mercadotecnia de Caixanova, Jorge Santos, Jacobo Buceta, en representación do Grupo Radio Vigo, así como xogadores do Celta Indepo, o Pilotes Pousada, o Vigo Voleibol e o Xuvenil de Teis, que tampouco quixeron faltar á cita.

O partido, que estivo dirixido polo árbitro internacional vigués de baloncesto en cadeira de rodas Jorge González Marqués, resultou moi interesante e con constantes alternativas no marcador. Os asistentes puideron comprobar nas súas propias carnes a dificultade de coordinar o movemento da cadeira co bote do balón e, especialmente, sufriron esa maior complicación á hora de lanzar canastra. Ao final, despois dun choque moi disputado e entretido, a vitoria foi parar a mans do equipo branco por unha mínima renda (26-33), aínda que o resultado era o menos importante. O obxectivo xa estaba cumprido.