As polémicas decisións dos colexiados, excesivamente rigorosos coa defensa viguesa e permisivos coa catalá, privaron ao conxunto de Abraham Carrión de conseguir o triunfo en Badalona (64-62).
"Non adoito falar nunca dos árbitros pero nunca vira nin vivido nada así. Foi o maior roubo que eu presenciei. E non só pola inexistente falta que pitan a falta de 9 segundos a Najib, co que mesmo se desculpa o árbitro ao rematar o partido, senón polo constante chorreo durante todo o choque". Desta forma resumía Abraham Carrión, técnico do Aldasa Amfiv, a sorprendente derrota do seu equipo en Badalona ante o Joventut Gam (64-62), aínda que tamén recordaba que "se estariamos un pouco máis acertado nos tiros libres e non fallásemos varios contraataques claros, poderiamos gañar malia os árbitros".
O peor de todo é que o inicio do choque parecía anunciar un partido relativamente cómodo polo Aldasa Amfiv. Os vigueses facían moito dano aos cataláns cun Agustín Alejos practicamente imparable na zona e a súa boa defensa permitíalles sentirse cómodos e con confianza (9-17, min.10). Non obstante, todo cambiou radicalmente a partir do segundo cuarto. Os árbitros empezaron a reclamar un inesperado protagonismo no encontro, variando o seu criterio e aumentando enormemente a súa rigorosidade coa defensa do Aldasa. Por este motivo, os pupilos de Abraham Carrión empezaron a ter problemas de faltas. Ademais, os colexiados non mantiñan a mesma rapadoira coa defensa do Gam Joventut, que aproveitou o seu permisividad para pecharse na zona e evitar os balóns interiores dos visitantes. Os vigueses non atopaban posicións claras para lanzar e, por se fose pouco, desperdiciaron unha serie de contragolpes para incrementar a súa vantaxe, erros que os locais aproveitaban convertendo en canastra a acción seguinte. Deste modo, ao intermedio a renda do Aldasa case se esfumara completamente (26-30, min.20).
Os vigueses saíron tras o intermedio coa intención de romper definitivamente o choque pero atopáronse cunha nova volta de rosca ao criterio arbitral. Os colexiados castigaron a Agustín Alejos con dúas faltas en ataque totalmente inexistentes mentres que permitían á defensa do Gam Joventut aplicarse cunha incrible intensidade, raiando mesmo na violencia. Os nervios empezaron a atenazar os xogadores do Amfiv, que non sabían como superar a brutal defensa catalá porque os seus intentos por facelo eran castigados con extrema dureza polos seus rivais ou con falta en ataque pola parella arbitral. O único positivo desta situación é que dous importantes xogadores do Gam como Roberto Mena e Enric Sanz se colocaban, teoricamente, con catro faltas persoais e dous importantes xogadores do Gam como Roberto Mena e Enric Sanz tiñan que irse momentaneamente ao banco.
Teoricamente porque ao comezo do último cuarto o ex xogador do Amfiv Roberto Mena cometía a súa quinta falta persoal e para sorpresa de todos, especialmente do banco vigués, os oficiais de mesa levantaban a taboíña sinalando que era a súa segunda falta. E o mesmo sucedía pouco despois cando Enric Sanz tamén facía o seu quinta persoal e a mesa volvía sinalizar que era a cuarta. A pesar de todo isto, os xogadores do Aldasa souberon controlar bastante ben os nervios e manterse no intercambio de canastras que se convertera o partido.
A culminación á decisiva actuación arbitral chegou na recta final do choque, na que os visitantes foron castigados con dúas novas faltas en ataque nas súas dúas últimas xogadas. O choque estaba empatado a 62 cando, a falta de 9 segundos, os colexiados sinalaron falta en defensa de Najib tras ser derrubado clarísimamente por Silvio nunha flagrante falta en ataque. Tanto foi así, que ao rematar o partido o propio árbitro se desculpou co base internacional marroquí do Amfiv por o seu clamoroso erro. O pívot do Gam non errou os tiros libres e puxo en vantaxe aos locais. Pero aínda quedaba unha nova sorpresa. O Aldasa sacou de banda, recibiu Lorenzo Envó e foi agarrado polo brazo por un xogador catalán para evitar o seu intento de triplo. Inexplicablemente, os colexiados non sinalaron nada, o balón rematou en mans de Agustín Alejos e o seu lanzamento de tres puntos non entrou co que os cataláns se facían coa vitoria (64-62) mentres que os vigueses quedaban con cara de parvos, aínda asimilando a arbitraxe sufrida.
FICHA TÉCNICA
GAM JOVENTUT: Enric (14), Silvio (8), Bernal (-), Amora (16), Mineral (9) -cinco inicial-, Castilla (17), Guerreiro (-), Guadalajara (-).
ALDASA AMFIV: Najib Essahiri (12), Moncho Pombo (-), David Mouriz (8), Lorenzo Envó (7), Agustín Alejos (23) -cinco inicial-, Santi Comesaña (-), Xullo Vilas (6) e Lalo (6).
PARCIAIS: 9-17, 26-30 (descanso), 50-46 e 64-62 (final).
ÁRBITROS: Luque e Gómez. Eliminaron polo equipo local a Enric (min.40).
INCIDENCIAS: Encontro correspondente á sexta xornada da División de Honra de Baloncesto en Cadeira de Rodas disputado no Pavillón Olímpico de Badalona.
