O acto de entrega de premios do I Circuíto Cidade de Vigo de carreiras populares terá lugar mañá mércores 20 de xaneiro, ás 20:00 horas no museo Verbum-Casa das Palabras, en Samil (Avda. de Samil, nº17).

A Concellería de Deportes e a Fundación Vigo en Deporte teñen previsto premiar aos clasificados nos tres primeros postos de cada categoría. Ademais, a organización invita a tod@ atleta que queira achegarse á gala e tamén solicita a presenza de tod@s os gañador@s de premios en metálico (tres primeir@s de cada categoría). Está confirmada a presenza do concelleiro de Deportes, Xabier Alonso, e da directora-xerente da Fundación Vigo en Deporte (VIDE), Laura Magdalena, ademais do director do Verbum, Rosendo Covelo.

No transcurso da gala presentarase o circuíto 2010 (II Circuíto Cidade de Vigo), que terá varias novidades importantes e arrincará en marzo coa carreira 10 km. Cidade Universitaria. A derradeira proba do circuíto será, como en 2009, a tradicional Carreira do Pavo, no mes de decembro.

Marta Fernández (Comesaña Sporting Club) e Daniel Bargiela (Ourense Academia Postal) foron os gañadores da categoría promesa-senior, pero houbo tamén vitoria para Mónica incera (F-35), Carlos Adán (M-40), José Álvarez (M-50) e Sergio Ramos (M60).