O San Esteban de Beade culminará unha tempada fantástica, na que acabou campión do grupo 18 de Terceira Rexional, coa disputa da final da Copa Vigo, o torneo máis antigo de cantos se disputan na cidade.

Este domingo na Bouza, con ambientazo, sacou un 0-0 fronte ao defensor do título, o Victoria, e acadou o seu pase na quenda de penaltis (4-3). O meta do Victoria atrapou un lanzamento do rival, pero o once local mandou dous penaltis ao pau. A Copa Vigo máis igualada da historia (seis dos doce partidos necesitaron do lanzamento de penaltis e só en cinco dos encontros o factor campo funcionou) repetirá a final de 2002 entre Racing de Castrelos, que se clasificou o xoves pasado tamén na sorte dos penaltis, e o San Esteban. Os dous clubs xa saben o que é levantar o trofeo neste século porque o gañaron en 2002 e 2001, respectivamente.

O equipo de Beade, ademais, xa entrou na historia do campionato vigués por méritos propios: plantouse na final facendo unha arte da quenda de penaltis. En oitavos empatou no Novo Mirador ante o Candeán (1-1) e impúxose dende o punto fatídico; en cuartos, 2-2 no mesmo escenario contra o Matamá e pase nos lanzamentos de penalti; e en semifinais, frustrou a ilusión do Victoria de repetir presenza en Balaídos. O San Esteban eliminou a tres rivais de categoría superior, toda unha xesta.

González, na súa terceira tempada, guiou ao San Esteban á final como en 2010, e a deste sábado 23 en Balaídos (18:00 horas) servirá para lembrar a de 2002, cando o Castrelos impúxose ao San Esteban (2-1). Curiosamente no choque de Coia o técnico beadense non puido estar por motivos laborais, dirixindo ao equipo Alberto Remeseiro, que leva a área da preparación física.