O Iveco Universidade de Vigo xogará por segunda oportunidade na súa historia a eliminatoria de ascenso a División de Honra (Liga Renfe), e farao enfrontándose ao CRC Madrid, exactamente igual que en abril de 2006, cando se eliminou con este equipo (baixo o nome de Canoe) a dobre volta.

O XV da Uvigo impúxose este domingo por 15-12 (mesmo resultado ao descanso) ao FC Barcelona no campo das Lagoas-Marcosende, desprazando así do segundo posto ao conxunto catalán na décimacuarta e derradeira xornada do grupo 1 e obtendo o pase ao play-off. A imaxe, da ledicia de xogadores e afeccionados ao remate do partido, feita por Manu Bravo.

O conxunto que adestra David Monreal e Norm Maxwell conseguiu que as bancadas do CUVI enchésense cuns 700 espectadores, a mellor entrada do ano. O presidente de VIDE e concelleiro de Deportes, Xabier Alonso, asistiu ao partido, do mesmo xeito que o vicerreitor de Extensión Universitaria, Xosé Henrique Costas, e o presidente da Federación Española de Rugby, Alfonso Mandado.

Nunha mañá asollada e de moito frío, o Uvigo remontou un marcador que empezou adverso (0-3, 3-6, 3-9) para imporse liderado polo internacional de "seven" Carlos Blanco. O conxunto vigués acabou segundo na táboa a pesares de que sufriu unha derrota máis que o Barça (catro por tres), pero esta tempada os bonus alcanzados pola formación galega foron claves para superar aos blaugranas.

O Getxo é o campión de grupo, o Iveco foi segundo e os dous xogarán os play-offs. No grupo 2, o CRC Madrid, que xoga en Pozuelo (campo Val das Canas), rematou este sábado a liga como campión sen perder partido (na imaxe, o seu partido na Cartuxa sevillana), sendo segundo Les Abelles.

Os pozueleros eran equipo de División de Honra no verán (e gañaron dúas ligas e cinco copas entre 2000 e 2009), pero tiveron que vender a praza ao Bera Bera por problemas económicos.

Agora, o CRC é o "quince" que máis ensaios acadou nos dous grupos (96), o que máis puntos conseguiu (697) e o de mellor defensa (176 tantos en contra). O partido de ida xogarase en febreiro en Vigo, disputándose o de volta en Pozuelo de Alarcón.

Adestrado por Miguel Ángel Puerta, o CRC ten tres romaneses (o internacional Manole Dorin, Christian Lungeanu e Andrei Viadeanu), un polaco (Tommek Przybyszewsk) e un francés (Nicolas Gajan). O ano pasado, co nome de Olympus XV, foi a base do equipo que disputou competición europea pola interese federativo.

O Iveco, como Valery Karpin Uvigo (na foto que pecha a información), disputou este play-off no ano 2006, con dobre derrota: 12-26 en Vigo e 57-16 na volta. Ramón Amoedo era o presidente dos universitarios e José Ángel Martín, "Trosky", o adestrador. Agora, quenda para Ramón González-Babé como primeiro directivo e para o tándem Maxwell-Monreal no banco.