Cabecera Vide

En marcha a iniciativa "Apoia ao deporte vigués", co sorteo dunha viaxe de fin de semana e 45.000 euros para os clubs

Sorteo VIDE 2023Dende este venres a Fundación Vigo en Deporte e Viaxes Zonda, compañía un ano máis envorcado co deporte de base, abriron a iniciativa “Apoia ao deporte vigués”, da que se espera acadar 45.000 euros para os clubs do programa Siareiros mediante o sorteo dunha fin de semana en Portugal.  

Manel Fernández, vicepresidente de VIDE e concelleiro de Deportes, expresou o seu agradecemento a Alice Martínez, a directora da axencia viguesa. O edil asegurou que "o tecido empresarial vigués apoia a VIDE ben con achegas económicas directas, ben con outras accións imaxinativas que tamén permiten aos clubs obter máis ingresos atípicos e ámbalas fórmulas son benvidas".

Viaxes Zonda oferta unha viaxe de dous días (19 e 20 de outubro deste ano) polo norte do país veciño (Aveiro, Porto e Braga) en hoteis de catro estrelas e con guía acompañante dentro do seu programa “Club Finde”. Viaxes Zonda é un dos patrocinadores da Fundación Vigo en Deporte dende hai anos e cada tempada aporta unha viaxe para sortear. O boleto entregarase coa doazón de 1 euro.

Nesta oportunidade a promoción estará activa ata o 15 de abril. O sorteo terá lugar cinco días despois, o 20 de abril, sábado, no descanso do partido entre o Iberconsa Amfiv e o Amivel, da División de Honra de baloncesto en cadeira de rodas.

Esta é a segunda acción en formato sorteo establecida por VIDE na tempada 23/24, despois de que en decembro se sortease unha motocicleta co patrocinio de Hyupersa Vigo (Hyundai). Con estas dúas accións, as entidades deportivas adscritas ao programa Siareiros sumarán esta tempada preto de 100.000 euros extras en total grazas ás doazóns (1 euro por boleto). 

Bases do sorteo en https://www.facebook.com/vigoterreodexogo