A Supercopa de España de fútbol sala regresa a Vigo dez anos despois de que o Caja Segovia conquistásea en formato de partido único, con Santiago Domínguez como concelleiro de Deportes do Concello vigués. Naquela oportunidade (setembro de 2000), un gol de ouro de Daniel deu a vitoria aos segovianos sobre o Playas de Castellón (6-5) ante uns 1.700 espectadores. Ademais, aquel triunfo serviu para que o Caja Segovia levase o trofeo en propiedade ao gañala por terceiro ano consecutivo.

Agora, na súa vixésima edición, o torneo regresa ao IMD pero cun sistema de xogo máis atractivo que se utiliza desde 2006: catro equipos, semifinais (hoxe) e final (mañá). Inter Movistar, vixente campión, afronta a proeza do Caja Segovia pero por segunda vez na historia da competición, xa que o conxunto alcalaíno tamén lla quedou en 2004, ao imporse nas tempadas 01/02, 02/03 e 03/04. O Inter gañou os dous últimos anos e agora pode converterse en máis lenda.

Co aliciente dun equipo galego (o santiagués Xacobeo 2010 Lobelle), dun vigués nas súas filas, “Pola”, e de que dous internacionais poden gañala de novo dez anos despois. Trátase do porteiro Luis Amado (oitava tempada no Inter) e do ala-pivote Daniel (sétima tempada no Inter), en 2000 no Caja Segovia e agora no Inter Movistar. En 2000 gañaron o título e agora poden repetir na mesma cancha.