O club Club Baloncesto Seis do Nadal - Coia, organizou os pasados días 30 e 31 de agosto a Terceira Edición do seu Torneo de Baloncesto 3x3 nas pistas do Colexio Seis do Nadal no barrio de Coia, pistas que levan todo o mes de agosto sendo o escenario dos primeiros adestramentos da tempada dun gran número de equipos da entidade viguesa.

O torneo contou cun total de 35 equipos, que se inscribiron para participar neste Torneo de Baloncesto 3x3 que marcou o inicio das competicións oficiais da presente tempada 2013/14. Na tarde do venres 30,  saltaron á pista os equipos de categoría minibásquet, infantil e cadete; sendo na xornada do sábado 31, o turno da competición de categoría júnior e sénior.

Preto de 200 xogadores e xogadoras participaron no Torneo. Los Padrinos, Vigo Eagles, La que se avecina, Sedona Girls, Los Star, Los Pachangas, Rosalianos, Bayonetas, Perros de Peleas, Los Ñbas, Rookies, Celsos ou Gregg Popovich foron algúns dos nomes dos equipos participantes.

Despois da disputa dos preto de 80 partidos, os conxuntos campións desta terceira edición foron Volcano en categoría minibásquet, Los Pachangas en categoría infantil-cadete; e Perros de Peleas en categoría júnior-sénior. Os equipos subcampións das tres categorías foron GB Blues, Rosalianos e Rookies respectivamente.