O complexo deportivo das Travesas, dependente da Concellería de Deportes do Concello de Vigo, mellora as súas instalacións. A Pista Vermella mudou o vello solo sintético por parqué flotante.
O custo da reforma do polideportivo no que teñen a súa base o Maniotas (ximnasia rítmica) e Bádminton Rachaplumas, entre outras entidades, foi duns 98.000 euros.
Iniciouse no verán para non interferir coas competicións e rematouse en menos dos tres meses previsto no prego de condicións.
O Maniotas comezará os adestramentos de pretempada a partires do vindeiro día 21 e a súa representación á visita co alcalde da cidade, Abel Caballero, e co edil de Deportes, Manel Fernández, amosaron a súa felicidade polas melloras introducidas no polideportivo.
Ademais, na visita o rexedor aproveitou para ver o arranxo da pista do Central. O Pavillón Central das Travesas vai acoller na primeira fin de semana de setembro dous eventos de importancia nacional.
O sábado 2 (18:00 horas) a XVIII Supercopa feminina de balonmán entre o Mecalia Guardés e o Rocasa Gran Canaria; o domingo 3, o II Memorial Quino Salvo de baloncesto masculino (12:15 horas) entre os clubs ACB Obradoiro e Barcelona.
E para eses eventos o coliseo está de estrea porque mellorou o seu parqué: nas dos últimas semanas foi lixado, barnizado e pintadas de novas as liñas da pista de xogo.
O adestramentos de pretempada arrincan na segunda metade de agosto para moitos equipos e o programa municipal de escolas deportivas, en outubro.